ထိုင်းနိုင်ငံသည် မြန်မာနိုင်ငံ ပိုင်ရေသယံဇာတမှ တစ်နှစ်လျှင် ကန်ဒေါ်လာသန်း ၇ဝဝ မှ ၈ဝဝ ကြား အမြတ်ရနေသည်ဟု MFIIV LTD မှ ဥက္ကဋ္ဌဖြစ်သူ ပြင်သစ်နိုင်ငံသား Mr. Jean PICHONက ပြောသည်။
ထိုင်းနိုင်ငံသည် ၁၉၆ဝ-၆၁ ခုနှစ်ကတည်းက ၄င်းတို့တွင် ငါးသယံဇာတမရှိတော့ကြောင်း ကမ္ဘာကသိအောင် ကြေညာထားသည့် နိုင်ငံဖြစ်သော်လည်း ထိုင်းနိုင်ငံတွင် ငါး သယံဇာတ ပေါကြွယ်ဝပြီး ကမ္ဘာပေါ်တွင် နံပါတ်တစ် အိတ်စပို့လုပ်နိုင်သည့် နိုင်ငံဖြစ်နေကြောင်း၊ ထိုင်းနိုင်ငံမှ ငါးအားလုံးသည် မြန်မာနိုင်ငံမှ လာရောင်းသည့် ငါးများ ဖြစ်ပြီး မြန်မာနိုင်ငံ၏ အလုပ်သမားငါးသိန်းခန့်သည် ထိုင်းနိုင်ငံ၏ ငါးစက်ရုံများတွင် အလုပ်လုပ်နေကြသည်ဟု Mr. Jean PICHONက ဆက်လက်ပြောသည်။
”ရနောင်းမြို့က လွန်ခဲ့တဲ့ အနှစ် ၂ဝ လောက်ကဆိုရင် သေးသေးလေးပဲ။ အားမနာတမ်းပြောရရင် မြန်မာနိုင်ငံကြောင့် အခုဆိုရင် အရမ်းဖွံ့ဖြိုးတိုးတက်သွားတာ။ သူတို့တွေ မှာ အမြတ်အစွန်းတွေ အများကြီးရပေမယ့် မြန်မာနိုင်ငံမှာကျတော့ အအေးခန်းစက်ရုံတွေ ပိတ်ထားရတယ်”ဟု ၄င်းကပြောသည်။
တနင်္သာရီတိုင်းဒေသကြီးတွင် တိုင်းရင်းသားအမည်ခံ ထိုင်းငါးဖမ်းသင်္ဘော ၅ဝဝ ခန့်သည် တရားမဝင် စည်းကမ်းမဲ့ ငါးဖမ်းယူမှုများကြောင့် မြန်မာနိုင်ငံသယံဇာတများ တဖြည်းဖြည်းရှားပါးလာပြီး ငါးမရှိ တော့ကြောင်း၊ ကမ္ဘာသိအောင် ကြေညာထားရသည့်ထိုင်း နိုင်ငံတွင် ငါးများပေါနေကြောင်း၊ မြန်မာနိုင်ငံတွင် နိုင်ငံတကာအဆင့် အတန်းမီ ငါးလေလံဈေးနှင့် အအေးခန်းစက်ရုံများ ပိတ်ထားရသည့် အခြေအနေမျိုးဖြစ်နေကြောင်း အထက်ပါပုဂ္ဂိုလ်ထံမှ သိရသည်။
”လူတွေက ကျွန်းသစ်တွေ နိုင်ငံမှာမရှိတော့ဘူး၊ သယံဇာတ တွင်းထွက်ပစ္စည်းတွေ မရှိတော့ဘူးလို့သာ ပြောနေကြတာ ငါးကိုအာရုံမစိုက်ကြဘူး။ အခုလို ငါးတွေကို တရားမဝင် ရောင်းနေတာတွေ၊ အမည်ခံလှေတွေ မြန်မာပြည်မှာ ဝင်ဖမ်းနေတာ မြစ်ဆုံကိစ္စတမျှ အရေးကြီးပါတယ်။ ဧရာဝတီမြစ်ကြီးဟာ မြန်မာနိုင်ငံရဲ့ အသည်းနှလုံး ဖြစ်သလို မြန်မာ့ပင်လယ်ပြင်ကြီး ဟာလည်း မြန်မာ့အသည်းနှလုံး ဖြစ်ပါတယ်။ ဒါကို သေသေချာချာ မကိုင်တွယ်ဘဲ ဒီအတိုင်းဆက်သွားမယ်ဆို နောက်ဆိုရင်ရေငန်ငါး ပျောက်တော့မယ်။ ဒီကိစ္စတွေကို သက်ဆိုင်ရာ အကြီးအကဲတွေ အာရုံစိုက်ဖို့လိုပါတယ်။ ပင်လယ် ပြင်ကြီးထဲက တရားမဝင်ငါးဖမ်းမှု၊ အမည်ခံငါးဖမ်းမှုတွေကို အဖြစ် လောက်ပဲ စစ်ဆေးတာတွေကို မျက်ကွယ်ပြုထားရင် အရမ်းအန္တရာယ်ရှိပါတယ်”ဟု အထက်ပါ ပုဂ္ဂိုလ်က ထပ်လောင်းပြောသည်။
တနင်္သာရီတိုင်း ဒေသကြီးတွင် မြန်မာအမည်ခံ ငါးဖမ်းသင်္ဘောများအပြင် နိုင်ငံခြားပိုင်ငါးဖမ်း သင်္ဘောများကိုလည်း ပုတ်ပြတ်စနစ်ဖြင့် မြန်မာ့ပင်လယ်ပြင်တွင် ငါးဝင်ဖမ်း ခွင့်ပြုထားကြောင်း၊ အဆိုပါ ငါးဖမ်းသင်္ဘောများသည် မြန်မာ့ပင်လယ်ပြင်တွင် ရက်အကန့်အသတ်ဖြင့် ပိုက်ဆံပေးကာ ငါးဖမ်းပြီး ၄င်းတို့ နိုင်ငံများတွင် ပြန်ရောင်းကြ ကြောင်း၊ ထိုကဲ့သို့ မိမိနိုင်ငံ၏ ကုန်ကြမ်းလိုအပ်ချက်ကို တခြားနိုင်ငံမှ ကုန်ကြမ်းဖြင့် တိုက်ရိုက်ဖြည့်ဆည်းခြင်းသည် ကမ္ဘာပေါ်တွင်မည်သည့် နိုင်ငံတွင်မှ မရှိတော့သော် လည်း မြန်မာနိုင်ငံတွင် ဆက်လက်လုပ်ကိုင်နေဆဲ ဖြစ်သဖြင့် စဉ်းစားရန်လိုအပ်ကြောင်း ၄င်းကပြောသည်။
ထိုင်းနိုင်ငံရနောင်းသို့ တနင်္သာရီတိုင်း ဒေသကြီးမှငါးတန်ချိန် ၁၅ဝဝ မှ ၂ဝဝဝ အကြားရောင်းချလျက်ရှိနေကြောင်း Mr. Jean PICHONက ပြောသည်။
မင်းချစ်နိုင်
source:Thit Htoo lwin
No comments:
Post a Comment